| Marshy's profile嘉儀addicted to MUSIC/野食PhotosBlogLists |  Tools  Help |
|
March 29 每天NDSL自從買左ndsl之後, 差不多日日都要玩過, 無論係lunch, 返緊工, 臨訓前都要玩一陣先, 唔係就成日唔安樂. 網友們講得好啱, 玩nds真係會上癮架!!!
最近非常非常沉迷地玩緊一個game, 以前電腦就好興玩追女育成game, 最出名既要數''心跳回憶系列'', 想當年我亦為左呢個game狂煲幾晚通宵.....
依家ndsl終於都出左同類型既game, 仲係由''心跳回憶''既公司konami發行, 最最吸引既係今次追既係男仔!!!! 由於玩法同以前既都好相似, 所以好快上手, 不過衰在全部日文, 所以仍然要依靠攻略......辛辛苦苦print out左一大疊攻略晚晚係咁煲, 都咪話唔辛苦. 不過, 好好彩地我玩左2次都成功追到其中2個主角, 其中一個老師仲係超有難度, 網上好多人都攻破唔到佢, 但我好幸運地一攻就破, 仲要出到2個結局!! 唔係你估ndsl毒女浪得虛名呀??不過漫漫長路, 仲有6個主角要破, 努力!!
而''mario kart ds'' 由於一來掛住煲''心跳'', 所以少玩左好多, 二來玩到150cc尾3條賽道, d對手成q日都唔知做咩d車開得鬼死咁快又成日放炸彈,紅殼同藍殼, 攪到有時本來攞左第一最後都變左最尾........勁灰, 依家決定放棄.
最開心既係''應援團''終於爆左機, 玩過既人都知道最後既華麗有幾咁難, 當爆左個一刻個種開心真係冇法形容, 真係心入面都想流淚!!!!不過爆左日版, 反而美版就開始冇乜心機攻....
最近因為cherry生日去左ruby tuesday得到張會員卡, 所以成日都去買外賣. 平日去食會覺得好貴, 2個人去食lunch都要差不多500蚊, 不過依家有張卡就抵好多, 全部食物半價!!!阿妹最鐘意食佢個度既club sandwich, 夠大份d材料又新鮮, 半價左都係50蚊左右, 一份2個人食都得, 所以淨係呢樣外賣都叫左幾次; 另外我個人十分喜歡佢既超級巨型漢堡包!! 真係超大個, 個2舊漢堡十分juicy, 一個人當然食唔哂啦, 足足夠3個人食(當然如果同阿妹就2個人都ko左), 半價左都係50幾蚊, 抵過食2個m記餐!!!不過唔好既係佢張卡只有3個月限期, 3個月後又要比多400蚊去申請, 一係就要用10000分積分換, 一蚊等於一分, 低能, 邊有人可能係3個月入面食10000蚊呀!!都唔知邊個諗埋呢d idea既.....
一直好鐘意bobbi brown呢個化妝品牌, 佢既base做得好好, 個日放工經過入去本來只係想買個碎粉, 但係睇下佢既concealer stick又好好用, 搽左面上既紅根即時淡左好多, 不過要配合佢既brush用先有咁既效果. 最後把心一橫, 買左個碎粉掃, 一個胭脂掃, 一個濕粉掃, 一盒碎粉, 一個concealer stick, 一盒concealer for eyes仲有一支brush cleaner, 埋單2500蚊........雖然超心痛, 淨係一支碎粉掃都要600蚊, 不過用過後真係覺得值得, 個妝真係貼左好多, d粉唔會浮起哂, 而且控油時間長左. 多得又一城入面一個男sales, 佢好好人好詳細咁教我每一個上妝要點, 真係好有耐性. 但係留意入面亦有一個非常黑人憎既爆炸頭細細粒女sales, 呢個女sales超黑人憎, 上次我入去諗住搵番男sales叫佢介紹d畫眉既比我, 不過佢忙緊, 個女既就長期''牙''住係前面counter, 咁唯有問佢啦, 問佢如果想畫眉有咩工具介紹下, 因為我唔知佢地係用眉粉定眉筆, 咁就話: 你地有冇d畫眉既例如眉粉呀眉筆呀咁. 點知佢個樣好不屑咁, 直頭個樣好似話我地大鄉里乜都唔識, 跟住就好輕挑咁話: 下, 我地冇眉粉架wor, 我地都係用eye shadow畫架咋, 咁多色你自己睇下啦. 嘩, 頂你個肺, 態度甚差到我想即時扯佢2巴, 跟住我即刻話: 咁唔睇啦. 就拉左阿妹走. 過左隔離dior度一路睇野一路鬧頭先個sales, 好彩係dior度遇到個好好人既男化妝師, 佢唔知係咪偷聽到我地講野, 走埋來時態度勁好, 又猛咁同我地試化妝品, 最後唔好意思地都要買返少少野, 買左支洗面foam, lip gloss同lip liner(唔係老土架, 其實pro既lip makeup十分需要一支lip liner), 埋單7百幾, 又再一次個心勁痛.....
唉......睇來我呢個shopaholic都係冇得救架啦...... March 13 NDSL狂迷最近公司同事們都興起左一片NDS熱潮, 個個LUNCH都攞住部NDS打, 單打, 對打, 勁玩.
其實我買左NDS都有大半年, 之前都只係每晚臨訓前打一陣, 好少攞出街打. 但係依家眼見街度個個都攞住一部, 每10個人就有一個攞住.
地鐵仲誇張, 一個車廂裏面起碼有2-3個人攞住來玩. 不過不得不承認, NDS出既GAME真係快到暈, 到依家起碼出左幾百隻GAME, 雖然大部份都係日文（都有一部份係英文既）, 但係好多都好易明, 而且好多GAME都啱女仔玩, 又得意又新奇!!
之前買落既EZFLASH卡好多新GAME都玩唔到, 不過最近終於買左張R4, 最新既GAME都冇問題. 發覺我原來都玩過幾多GAME:
'孖寶兄弟' - 巳爆, 玩到最後個關居然又多一關, 一關入面又有幾關, 玩到人想丟機. 依家係得閒先玩, 主要係儲金幣;
'為你而生'同'為你而死' - 巳爆, 為你而生係第二集, 所以比較難, 不過好處係可以同個女仔換衫, 依家都係得閒先玩, 主要儲分換靚衫;
' Phoenix Wright - Ace Attorney' - 玩律師破案, 勁多文字，不過玩落又想玩埋落去, 要用D腦;
'Oshare Princess DS - Oshare Ni Koishite!' - 其實呢個GAME應該勁好玩, 最衰係全日文, 有D都唔識睇, 仲係摸索階段, LEVEL 1, 呢個最啱女仔玩. 可以換衫, 塗指甲, 化妝....等;
'大合奏樂隊兄弟' - 玩左冇幾耐, 勁難玩, 不過有好多日文歌, 居然有濱崎 步既'SEASON'!!;
'任天狗 ' - 養左隻P仔, 識聽我大部份指示, 其實都好乖, 得過指令獎TIM, 不過近排大多GAME要煲, 張卡冇位擺, 唯有BACKUP左佢一排先遲D先再養過;
'Meteos - Disney Magic' - 呢隻GAME超悶, 有D似MSN入面個隻DIAMONDS既GAME, 以為有DISNEY歌聽下, 點知過左關都係得幾多硬照, WASTE MY TIME;
'Hotel Dusk Room 215' - 我鐘意既解迷GAME類型, 剛剛開始CHAPTER ONE, 十分吸引, 不過比較多對話;
'彈唱 DS 結他 M-06' - 其實好想玩, 不過一定要識哂結他本身既符號同識睇譜先可以玩..............十分可惜
'麵包超人的五十音教音' - 我諗個GAME本身係比日本既幼稚園生玩既, 因為係教日文最基本個50個音同埋D單字, 但係對我唻講就啱哂啦, 可以隨時隨地REMIND到我呢50個音;
'料理媽媽' - 全個GAME有74款料理, 暫時玩左50幾款, 大部份都好易玩, 難在點樣搵哂全部款式, 停一陣尚待努力;
'Happy Feet' - 好簡單好簡單既一個音樂GAME, 其實都幾悶, 來來去去得2款遊戲, 不過勝在佢所以既歌真係套戲入面既歌而且仲係原唱!!!
' Final Fantasy III' - 呢隻GAME真係經典, 佢係我有既NDS第一隻煲既GAME, 可惜當時煲既係日文版, 經常要攞住疊番譯同攻略, 好麻煩. 但係佢既CG真係做到一流, 入面既主角勁靚仔靚女, 畫頭睇幾多次都唔厭. 不過當時聽到會有中文版出, 玩到臨尾時停左.......;
' 芭比 12 - 舞蹈公主' - 好簡單好簡單既除障礙物GAME, 勁白痴, 一個鐘包可以玩到一半, D公仔畫得勁差, 同封面完全唔同, 同樣爛尾;
' Elite Beat Agents' - 呢隻係人人狂煲應媛團既英文版, 同日文版完全唔同, 冇日文版咁難, 不過其實到第二級都開始勁快跟唔到, 需要好一段時間狂煲. 依家打到第二級最尾個關, 巳經打到我想丟機;
' The Little Mermaid - Ariel's Undersea Adventure' - 呢個GAME其實同芭比個個一樣好白痴, 不過佢勝左有個GAME好得意, 係教你唱歌, 一定要唱到佢SHOW既音度, 否則就FAIL, 我玩時感覺: 依家既科技真係一日千里呀!!!
' 超執刀' - 呢個GAME係玩做手術, 都十分有難度, 暫時玩到第7-8個手術, 超難, 放棄了;
' 日式麵包王！遊戲一號！頂上決戰！' - 其實都幾好玩, 唔太難, 有少少似大富翁式既GAME, 不過又係全部日文, 睇得太辛苦, 中途放棄了;
' Mario Kart DS' - 最近先熱愛玩, 十分易上手, 話難又唔難, 話易又唔太易, 呢個GAME最好玩係可以8個人同時WIFI賽車, 正!!
' 超級桃子公主' - 擺明係食孖寶兄弟條水, 同類型GAME, 唔同既係主角換左做公主, 但係畫面勁差, 玩落硬係比孖寶差, 寧願玩番孖寶;
'麻雀大會' - 呢個GAME好明顯係玩到悶, 用來ZIP時間玩既, 冇話好唔好玩既, 好似平時打牌過日辰咁;
'押忍！戰鬥！應援團！' - 呢個GAME係我最近狂煲既GAME, 真係又愛又恨, 依家玩到團長一半, 巳經快到嚇死, 真係試過玩到丟機(好彩部機冇事...), 不過上左癮唔玩又唔安落....
'Another Code - Two Memories' - 巳爆. 呢個都係解迷GAME, 我玩既係中文版, 所以破關好快, 不過一樣必須要有攻略在身, 否則永遠都唔洗旨意過關.
'Sprung - The Dating Game' - 巳爆. 呢個係一個純文字GAME, 好美式既追異性GAME, 勝在可以揀追男OR追女, 主要係玩揀啱回覆既答案先可以過關, 玩到一半其實都有D難度. 同埋英文都幾美式, 英文差既人可能會覺得好悶.....(講明先我唔係話我英文勁)
如果有玩開以上既GAME又同我住得近既朋友, 歡迎向我JAM機甚至挑機, 不過講明先, 我打得唔係好勁架咋........
|
|
|
